تنويه

تم الإنتقال إلى المدوّنة الجديدة لو كويت Le Koweit

السبت، أبريل 10، 2010

ما هو سر اللوحات ؟!

شغلني موضوع ... شغل تفكيري في اليومين اللي طافوا .. ما هو سر اللوحات ؟!
 
عشان تفهمون عن شنو بتكلم شوفوا الصورة أدناه ....








نلاحظ 6 لوحات مختلفة في هذه الصورة ، كلها بعد الغزو ... 6 لوحات خلال 20 سنة فقط !
والأغرب من ذلك ، بين اللوحة الأخيرة وقبل الأخيرة سنتين فقط !

ألا تلاحظون معي أن الموضوع غريب .. لا أعلم لماذا أشعر أن الموضوع "فيه إنّ" . وزارة الداخلية تركت شغلها ومشاغلها وجلست تفكر وتتفنّن في تغيير لوحات السيارات بمعدل لوحة جديدة كل 3 سنين وثلث .. عشان المواطن ما يمل من لوحة سيارته !

لا أدري لماذا أشم رائحة الفساد الكريهة في هذا الموضوع ، تلك الرائحة التي زكمت أنوفنا واعتدنا رائحتها في كل خطوة تخطيها الحكومة ، وفي كل عمل تقوم به الحكومة .. إلا ما رحم ربي -عشان ما أظلم- .

حاولت خلال اليومين الماضيين أن أبحث عن هذا الموضوع ، وحاولت "أنبّش" لكني لم أجد شيء ، لا أدري هل لأن الموضوع ليس بتلك الأهمية كيلا يلتفت إليه أحد .. أم أن الموضوع عليه تكتيم "مضبوط" ؟!


الحقيقة لم أجد ما يشفي الغليل تجاه هذا الموضوع ... لذا وددت أن أطرح القضية ، فإن كنتم تعلمون شيئاً مفيداً عن هذا الموضوع ...
أفيدونا أثابكم الله .



حقوقي ،

هناك 14 تعليقًا:

YusuF.AsKR يقول...

الواضح والمعتاد من وراء هالحركات ,, أنها مسألة تنفيع عن طريق مناقصة عمل هذي اللوحات , بس مادري منو إهي الشركه اللي راح إتسوي اللوحات لأن بمجرد معرفة إسم الشركه أو أصحابها راح تتضح الامور أكثر وأكثر !!

بس بصراحه , شكليا , اللوحه الجديده أفضل من كل ماسبقها من اللوحات

تحياتي لـئـلك

(:

le Koweit يقول...

فعلا ، وهذا اللي اثار استغرابي
ان الموضوع مافي عنه اي معلومات !!

اما عن الشكل
انا معاك احلى لووول
بس مو معقولة الوزارة حيل تحب المواطن
لدرجة تغير الشكل كل 3 سنين عشان تبحث عن الاحلى
والاكشخ :)

حياك الله اخوي

غير معرف يقول...

السلام عليكم

اليوم انا واختي طالعين شفناهم كاثرين هاليومين اللي آخر لوحة، سالته قتلها شنو سالفتهم قالتلي ما ادري بس شكلهم احلى من اللي قبل D: لووول

اتوقع مثل ما قال اخوي (ابو غرايم) انه هاللوحات لشركة معينة وبتربح ولو نعرفهم بتوضح السالفة اكثر لكن شدعوا التغيير صار بين فترة بسيطة جدا !

يعني حتى اللوحات القديمة للحين ما تجددوا ولوحة 2009 للحين ما خذت حقها اصلا !! يعني خلصت المشاريع عشان الحكومة تقدم مناقصة من هالنوع (السخيف)

ما اقول الا الله يستر على هالبلد وعلى عيالها

يعطيك العافية واستمر (محمد)احنا متابعينك = )

اختك unnormal G!rl

le Koweit يقول...

unnormal G!rl /

هلا فيج اختي ، منورة المدونة :)
والله عدل كلامج
الحكومة بدال ما تلتفت حق التنمية ومشاريع البلد الحيوية
قاعدة تبدل لوحات السيارات كل شوي
عشان تنفع فلان وعلان

الله يستر على البلد من هالحكومة

مشكورة على تعليقج :)

panadool يقول...

واضح إنه تنفيع بتنفيع

panadool يقول...
أزال المؤلف هذا التعليق.
le Koweit يقول...

بنادول /
انا اللي محيرني .. حق منو ؟!

غير معرف يقول...

السلام عليكم

الووحة الجديدة احلى واكشخ وخلهم ينفعونهم دام احنا قاعدين ببيوتنا مرتاحين خلهم يسوون اللي يسونة وعليهم بالعافية ولحد يفهمني غلط :)

وملاحظة للأخت المو طبيعية اكتبي النك جذي abnormal not unnormal

اخوكم مشاري السندي

le Koweit يقول...

شلون عليهم بالعافية يا مشاري
انت الظاهر حكومي P:
هذا مال عام
والدفاع عنه واجب على كل مواطن


شكرا على الملاحظة ..
عدل يا الجامعة الأمريكية صدتها :>

غير معرف يقول...

و سالفة حكومي وما حكومي وادري ان واجب كل مواطن لكن هم ما بيدك شي بإذن الله لم يصيرلك عيال ربهم على هالمفاهيم خلاص اللي فات مات اهتم بالجيل الجديد عشان تخف هالامور وعلمهم عن هالامور الطيبة وانت اذا مسكت بإذن الله وانا بصراحة متفائل فيك جداً جداً التزم بالنظافة وابتعد عن الاشياء المشبوهة تقبل تحياتي

مشاري السندي

le Koweit يقول...

اوكي راح اربي عيالي على هالمفاهيم انشالله
بس مني لين اربي عيالي نخلي البعض يلعب بالديرة ؟
وينهب من المال العام ؟
ما يصير لازم نسوي اي شي ولو حتى بسيط
عشان لما نقابل الله عز وجل
راح يسألنا سبحانه كنتوا تشوفون الحرامية يسرقون شنو سويتوا ؟
لا تنسى ان الساكت عن الحق شيطان اخرس ،
وان اضعف الايمان ان يغير المرء المنكر "بقلبه" فقط
فليكن لدينا أضعف الايمان على الاقل يا السندي :)

واشكرك عالكلام اللي قلته ،
وانا والله متفائل فيك ، ان في شباب مثلك تهمهم مصلحة الوطن
وهذا اللي يخليني اتفاءل بالمستقبل :)

غير معرف يقول...

بسيطه دور علي صاحب التوريد للوحات وشوف علاقة بقياديين الوزارة

غير معرف يقول...

بسيطه دور علي صاحب التوريد للوحات وشوف علاقة بقياديين الوزارة

نفس اللوحات الالكترونية اللي مالها هدف للحين :)

اخوك
Bo AhMaD

le Koweit يقول...

عدل كلامك اخوي بو احمد

المشكلة منو هالشخص ؟

الموضوع عليه تكتيم :/
!!