شخصية بو مشعل ، شخصية الرجل البدوي
في بو قتادة وبو نبيل ، كلنا نعرفها أكيد
الشخصية هذي مثل ماهو معروف تمثل البدو ،
لكن صراحة اللي قاعد يصير ما ينسكت عنه
اتذكر في نسخة بو قتادة وبو نبيل اللي انعرضت في رمضان 2008
شفت جم حلقة منه ، ما يستحون
دايم يصورون بو مشعل انه شخص توه متجنس
وجنسيته ممكن تنسحب بأي لحظة ، ودايم خايف من هالشي
ودايم يردد (( ياويلي ويلاه بتنسحب جنسيتي !! ))
ولا (( عز الله انسحبت الجنسية ))
غير طبعا الصورة السيئة اللي يظهر بها ...
يعني كأن البدو توهم متجنسين ، يعني البدو مو كويتيين !!
شدعوة يبا البدو اكثرهم كويتيين بالتأسيس ومن بداية قيام الدولة ،
قبائل كثيرة شاركت في بناء الدولة ..
ولا صارت الدولة الحين بس حضر ؟
انا ما ودي اقول هالكلام واسولف بحضر وبدو
لكن هالمسلسل صراحة ما ينسكت عنه
وهذا غير اللي سووه امس ،
كاتبين بالصفحة الاولى بجريدة الوطن ملخص لحلقة اليوم من بو قتادة وبو نبيل ،
وكاتبين (( واستعمل بو مشعل الجني وصار يلعب بالبورصة ، وصار عنده فلوس ، وصار من عيال بطنها .. ))
!!!!
شنو صار من عيال بطنها ؟؟ يعني ما يصير من عيال بطنها الا اللي معاه فلوس ؟
والفقير مو من عيال بطنها ؟
ولا عشان بو مشعل بدوي مو عادينه من عيال بطنها ؟
اما بو قتادة الميسور الحال ينعد من عيال بطنها لأنه حضري ؟
شهالحجي يبا والله عيب ..
انا ما اتكلم عن بو مشعل ولا بو قتادة ،
هذول شخصيات وهمية ،
لكن اتكلم عن ما يمثله بو مشعل ...
جريدة بحجم جريدة الوطن ، وتلفزيون مثل تلفزيون الوطن
ومعورين راسنا بالوحدة الوطنية ومحاربة الفتنة
وآخرتها هذي سوالفهم ؟؟ هم اللي يزرعون بذور الفتنة
هم اللي يفرقون بين حضري وبدوي ؟ وبين سني وشيعي ؟
والله عيب ، لو تجي من جريدة ثانية جان ميخالف ،
لو تجي من تلفزيون ثاني جان ميخالف
بس من الوطن ...
والله عيب ... عيب
حقوقي ،
هناك تعليقان (2):
اي شوف غنية البدايه و شوف زوجة بو مشعل لما طاحت من البعير و قعدت تغني و برقعها او نقابها عند مؤخرة البعير اخوي يعني صراحه انا اشوف في تهجم على البدو في المسلسل ولكن من خلف الستار
.
.
.
تقبل مروري مع الشكر
اخوي هو برنامج كوميدي من الدرجة الاولى قلد شخصيات الكويت جميعها من غير طائفيه او اي شيء من هالقبيل وحب يزرع الابتسامع على واقع حاصل في دولتنا ومد ينكر هالشي صار يعني نحط الحضري تنسحب جنسيته اهو بس توظيف الاشياء يعني هم الخوال تأذو يوم حلقة الخوال وهم عيال بطونها تأذو لما بونبيل كان سكران وهم الميسور بو قتادة تؤذوا يوم حلقة ابوه مو مخلي ديره الا ومتزوج فيها اهو كوميديا من الدرجة الاولى ولا يمس اي ظائفة معينه
إرسال تعليق