11 كيلو متر تستغرق 5 سنوات
الكليب: طريق الجهراء تكلفته أكثر من 264 مليون دينار
هذا أول الخير، وأول مشاريع خطة التنمية العجيبة .
طريق الجهراء البالغ طوله 11 كيلومتر سيتم تطويره بـ 265 مليون دينار ، طبعاً دينار كويتي مو عراقي !
الحقيقة إلتبس علي الأمر ووقعت في حيره من أمري، فلم يفصح السيد وكيل الوزارة عن نوعية "القار" المستخدم، هل هو "قار" مذهّب ؟ أم مخلوط بـ"ماي مقري عليه" .. ؟
لهدرجة ؟!
وعلى عينك يا تاجر ؟!
وفي وضح النهار ؟!
وبتصريح للجرايد بعد ؟!
265 مليون على طريق طوله 11 كيلومتر ؟
وعلى فكرة الطريق موجود، بس راح يطورون الطريق (تبديل القار) .
بعد حسبة بسيطة يطلع علينا الكيلومتر الواحد بـ 24,069,454 د.ك وخردة ... يا بلاش .
كل ما أود قوله، أن أوجه تهنئة من القلب إلى الشعب الكويتي .
هنيئاً لكم بهذه الحكومة، وبهذه الوزارة .. فعلاً وزارة "ما ينقص عليها" وتعرف تدور أرخص وأحسن شيء .
وزارة تخاف الله في المال العام المؤتمنة عليه .
والله يعز الحكومة ... وسلّملي على خطة التنمية اللي هذي أولها .
حقوقي ،
هناك 8 تعليقات:
ما ودي ادافع عن الحكومه بس تصحيح بسيط
5 كليومتر مو تبديل قار
جسر علوي
طبعا ما يمنع انه غالي
انت متأكد دينار كويتي مو دولار ؟؟ المبلغ مبالغ فيه جداً
فورزا كويت /
وحتى على افتراض انه جسر علوي فعلا
هم يظل غالي وغالي حيل بعد :)
حياك الله ،
سامي /
للاسف يا عزيزي متأكد
انا اول ما قريت الخبر عبالي 265 ألف دينار
آخر شي استوعبت انه مليون مو ألف !!
إذا صح الخبر
ليس جديد عليهم ومو أول مرة
زهقنا من كثر مانسمع بقصص التنفيع والتنفيع
تحياتى
بنادول /
صح مو جديدة عليهم
بس والله قلبي يعورني
يا جماعة تبون تسرقون اسرقوا بس مو جذي !!
بهالمبالغ الخيالية ؟! وفي وضح النهار ؟!
شي يبط الجبد والله ...
لووول شر البلية مايضحكني
عين بغزي /
.. ولكنه ضحك كالبكا
:)
إرسال تعليق